Ја знаете ли актерката Тили Норвуд? Тешко, бидејќи станува збор за AI „личност“ која наскоро ќе добие свој долгометражен филм.
Филмот се вика „Misaligned“ и е продуциран од Particle 6 Productions, истата компанија што го создаде дигиталниот лик Тили Норвуд, објавува Variety.
Филмот е опишан како приказна за созревање потопена во егзистенцијалниот хаос на вештачката интелигенција. Приказната се одвива во таканаречениот „Tillyverse“, каде што Тили се обидува да стане што е можно почовечка, а истовремено се соочува со заводлив бот од темната страна на интернетот.
Извршната директорка на Particle6, Елин ван дер Велден, вели дека филмот ќе биде „забавен, хаотичен и самосвесен, исто како Тили“. Ова ќе биде првиот долгометражен филм од Particle 6, кој претходно беше познат првенствено по своите кратки маркетиншки видеа со вештачка интелигенција.
Колку е ова реално?
И покрај големите најави, прашањето е дали овој филм воопшто ќе се сними. Компанијата нуди и AI алатки за филмски студија за генерирање пејзажи и визуелни ефекти, но не е познато колку овие решенија досега се користеле во големи продукции.
Сè уште не е откриено кој од филмската индустрија ќе учествува во проектот, но Particle 6 наведува дека продукцијата ќе ја комбинира работата на традиционалните филмски работници и AI експертите. Исто така, сè уште не е познато дали сценариото е завршено или кога филмот би можел да стигне до публиката.
Да потсетиме дека Тили Норвуд првпат беше претставена за време на промотивна кампања на Филмскиот фестивал во Цирих, кога предизвика бројни реакции во Холивуд и отвори дебата за тоа колку вештачката интелигенција може да ја промени филмската индустрија. Particle 6 потоа одговори со серија кратки видеа во кои сатирично ги коментираше овие стравови.