Веб платформата YouTube соопшти дека го суспендирала каналот на американскиот претседател во заминување Доналд Трамп бидејќи го прекршил правилото за корисници, со кое е забрането поттикнување насилство, по минатонеделниот упад во Конгресот на САД од страна на неговите приврзаници.
YouTube каналот на Трамп сега е оневозможен да поставува нови видео записи или стримови во живо најмалку седум дена, што може да биде и продолжено, се наведува во соопштението на YouTube.
Интернет платформите и компаниите за социјални медиуми се дистанцираат и преземаат мерки против оние кои поттикнувале или учествувале во минатонеделното насилство во Вашингтон.
Веднаш по инцидентот, Twitter и Facebook ги блокираа налозите на Трамп и ја отстранија целата содржина која го поддржува минатонеделниот напад, додека Amazon ја суспендираше социјалната мрежа Парлер, која моментно ја користат голем број приврзаници на Трамп.
Приврзаници на Трамп упаднаа на 6 јануари во американскиот Конгрес, обидувајќи се да ја спречат седницата за верификација на изборната победа на новоизбраниот претседател на САД, Џо Бајден. Трамп, кој ја оспори валидноста на победата на Бајден без да изнесе докази, на почетокот ги пофали своите приврзаници, но подоцна го осуди насилството.