Корисниците на Fitbit пријавуваат проблеми со прикажувањето на здравствените податоци по најновото ажурирање на апликацијата Google Health, а компанијата изјави дека ќе го реши проблемот.
Проблемот влијае на дел од корисниците на верзијата 5.12, кај кои приказот на клучните здравствени показатели е исчезнат – иако, во одредени случаи, се чини дека апликацијата продолжува нормално да собира податоци.
Меѓу информациите што корисниците повеќе не можат да ги видат се варијабилноста на срцевиот ритам (HRV), срцевиот ритам во мирување, нивото на кислород во крвта, брзината на дишење и температурата на кожата. Google потврди дека е запознаен со проблемот и работи на негово отстранување.
„Свесни сме за проблем што ги спречува некои корисници да видат одредени показатели, како што се виталните здравствени податоци, во рамките на апликацијата Google Health. Во моментов ја истражуваме причината и работиме на што побрзо решавање на проблемот“, изјавија од компанијата за Android Authority.
Повеќето пријави досега доаѓаат од корисници на iOS кои ја користат верзијата 5.12 на апликацијата. Оваа верзија пристигна на платформата на Apple пред соодветното ажурирање да стане достапно за Android. Засега, Google не прецизираше дали се погодени и корисниците на Android, ниту пак објави кога би можело да биде достапно трајно решение.
Додека чекаат официјална поправка, некои корисници успеале да го вратат приказот на податоците преку одјавување и повторно најавување во апликацијата Google Health. Други откриле дека помага префрлањето помеѓу неделен и месечен приказ на здравствените показатели. Сепак, ниту едно од овие решенија не гарантира трајно отстранување на проблемот. Добрата вест е што Google официјално потврди дека работи на поправање на грешката, но корисниците ќе мора да почекаат за следното ажурирање за да дознаат кога сите нивни податоци повторно ќе бидат достапни.
