Германската влада планира да го зголеми својот капацитет за вештачка интелигенција четирикратно до 2030 година, додека перформансите на општите центри за податоци треба да се зголемат барем двојно во споредба со 2025 година.
Целите на владата во Берлин се наведени во стратешкиот документ на Министерството за дигитални технологии, кој се очекува кабинетот да го одобри утре, објавува „Виершафтсвонер“.
„Сакаме да останеме во трката, да ја задржиме нашата водечка позиција во Европа, но и да останеме многу привлечни на меѓународно ниво“, рече министерот за дигитализација Карстен Вилдбергер.
Владата планира пакет од 28 мерки за зајакнување на Германија како клучен европски технолошки центар.
Еден од клучните чекори е забрзување на изградбата на центри за податоци преку подобро искористување на постојните локации, како што се поранешните енергетски централи, и поедноставување на процедурите.
Локалните заедници исто така би имале директна корист, бидејќи даноците во иднина би се наплаќале таму каде што се наоѓаат центрите, а не таму каде што се седиштата на компаниите.
Новите центри ќе мора да користат само енергија од обновливи извори, а се разгледува и можноста топлината генерирана од серверите да може да се користи за загревање на градовите и местата.