Renault најави дека наскоро ќе лансира ново електрично Twingo по цена до 20.000 евра, без субвенции, придружувајќи му се на уште еден француски производител, Citroën, во трката за пазарот на електрични автомобили.

Малото градско возило ќе се најде на пазарот во Европа во 2026 година. Renault ја објави новината еден месец откако Citroën го објави своето електрично возило ë-C3 по цена од 23.300 евра и вети верзија за 19.990 евра на почетокот на 2025 година.

Renault го претстави и првиот прототип на новото Twingo. Со тркалезни фарови и заоблен заден дел, наликува на линиите на моделот лансиран во 1993 година, кој оттогаш е продаден во повеќе од 2,5 милиони примероци.

Новиот електричен Twingo треба да биде готов за помалку од три години.

Ќе се произведува во Словенија

Не се објавени податоци за траењето на батеријата, но производителот ветува многу мала потрошувачка од 10 kWh/100 km, што е речиси половина од повеќето електрични возила.

Електричниот Twingo би требало да испушта 75 отсто помалку CO2 во својот животен циклус во споредба со просекот на сегашните возила.

Новото Twingo ќе се произведува во Европа, но не во Франција, туку во словенечко Ново Место, каде што се склопуваат и денешните модели на Twingo.

Ampere, новата подружница на Renault, до 2031 година ќе претстави седум модели: електрични Mégane, Scenic, R5 и R4, Twingo и два дополнителни модели.