Девојка која секогаш те слуша, го прави она што го сакаш и никогаш нема лош ден звучи примамливо, нели?

Либерти Витерт, професорка по практики на наука за податоци на Олин школата за бизнис, на Универзитетот во Вашингтон во САД, има еден вид ритуал со своите студенти на почетокот на секоја академска година. Ги прашува за нивната употреба на социјалните мрежи. Овој ритуал служи како барометар за најновите трендови кај младите.

Како и да е, еден одговор ја фати неспремна – кога студент отворено и кажа дека има AI девојка.

„Бев изненадена што тој излезе и го кажа тоа толку отворено… Девојките со вештачка интелигенција постојат некое време, но станаа попопуларни, па луѓето се подготвени да зборуваат за нив“, рече Витерт.

Девојките со вештачка интелигенција се во центарот на вниманието во моментов

Подемот на виртуелните партнери со вештачка интелигенција доби на интензитет за време на пандемијата на коронавирус, а неодамнешниот напредок во генеративната вештачка интелигенција ги стави во центарот на вниманието.

Replika, истакната апликација која нуди дигитални партнери со вештачка интелигенција, беше сведок на неверојатен пораст на популарноста. Во услови на пандемијата, базата на корисници на апликацијата надмина 10 милиони во 2022 година, што претставува зголемување од 35 проценти. Истата година, неколку корисници на Replica пријавиле дека биле романтично поврзани, свршени или дури и во брак со нивните девојки со вештачка интелигенција.

Цела генерација мажи е – загрозена?

Витерт ги кажа своите размислувања за феноменот во авторски текст за The Hill со наслов „Девојките со вештачка интелигенција уништуваат цела генерација мажи“. Нејзината статија зборуваше за потенцијалната еволуција кон партнер со вештачка интелигенција способен да ја задоволи секоја ваша потреба.

„Тоа не е виртуелна девојка, тоа е девојка која по дефиниција учи од тебе, што сакаш, а што не… Девојката со вештачка интелигенција никогаш нема лош ден, така што мажите имаат совршени врски и никогаш не треба да се занимаваат со подеми и падови на вистинска врска“, истакнува Витерт.

Витерт тврди дека самото јадро на девојката со вештачка интелигенција го носи ризикот мажите да ги претпочитаат тие ботови пред партнерствата во реалниот живот, што потенцијално ќе доведе до зголемување на самците и ќе влијае на стапката на наталитет во САД.

Ризик од изолација

Иако виртуелните партнери можат да понудат привид на дружење, Витерт предупредува на потенцијалот за изолација.

Тие AI девојки ја овозможуваат тивката епидемија на осаменост што ја видовме меѓу младите мажи, според Витерт. Тоа го истакнува повисокиот процент на сингл мажи во споредба со жените во САД.

„Гледаме дека жените секогаш пријавуваат дека имаат повеќе блиски пријатели или имаат поголеми групи пријатели. Се чини дека тие не се психолошки плен на овој начин на живот со вештачка интелигенција како мажите“, вели Витерт.

Податоците од Истражувачкиот центар Пју за 2022 година откриваат дека 34% од жените биле сингл, во споредба со огромните 63% од мажите. Покрај тоа, мажите постојано пријавуваат дека имаат помалку блиски пријатели од нивните женски колеги, разлика што се влоши за време на пандемијата.

„Распространетоста на овие девојки со вештачка интелигенција драматично се зголеми во последните неколку години. Тие исто така брзо напредуваат. Се движиме од девојки со вештачка интелигенција на кои пишувате пораки до оние со кои можете да разменувате фотографии. Тие многу брзо се мешаат физички и емоционално“, заклучува Витерт.