Мета ги тужеше кинеските компании HeyMods, Highlight Mobi и HeyWhatsApp за развој на „неофицијални“ WhatsApp апликации за Android кои биле користени за кражба на повеќе од милион WhatsApp сметки од мај 2022 година.
Во тужбата Мета наведува дека овие малициозни апликации може да се преземат од веб-страниците на трите компании, но и од Google Play Store, APK Pure, APKSFree, iDescargar и Malavida.
Откако ќе се инсталира, малициозниот софтвер вграден во апликациите собирал чувствителни информации од уредот, вклучително и информации за потврда на сметката, со цел да ги украде сметките на WhatsApp и подоцна да испраќа спам пораки.
Според Google Play Store, само една од овие апликации наречена AppUpdater за WhatsPlus е инсталирана од повеќе од милион корисници на Android.
Во јули, директорот на WhatsApp, Вил Каткарт, ги предупреди корисниците да не преземаат модифицирани верзии на WhatsApp и како пример ги наведе апликациите HeyMods и HeyWhatsApp.
„Овие апликации ветуваа нови функции, но беа само измами за кражба на лични податоци зачувани на телефоните на луѓето. Го споделивме со Google она што го откривме и работевме со нив за да се бориме со злонамерните апликации“.
Од средината на јули, Google Play Protect на Android е ажуриран за да открие и оневозможи претходно преземени злонамерни лажни верзии на WhatsApp на уредите со Android на корисниците, откако Мета го извести Google за тоа.
Каткарт тогаш рече дека ќе преземе акција против HeyMods за да спречи понатамошна штета, но и дека ќе ги „истражи правните опции за да ги повика на одговорност HeyMods и другите како нив“.
Мета ги тужеше трите компании за прекршување на условите за користење на WhatsApp и договорот за програмери на Мета.
Според тужбата, обвинетите се согласиле и биле обврзани со условите на WhatsApp кога ги создале различните сметки на WhatsApp. Тие, исто така, се согласиле и со условите на Мета, Условите на платформата и Упатствата за програмери по креирањето на Фејсбук страници и апликации.
Сепак, со преземањето на горенаведените дејствија, тие го прекршиле договорот со WhatsApp и Meta, предизвикувајќи WhatsApp да претрпи штети, вклучително и ресурсите што компанијата ги користела за време на истрагата за овие апликации.