Geely стана вториот голем производител на автомобили во светот кој „работи“ во вселената.

Кинескиот производител на автомобили Zhejiang Geely успешно лансираше девет сателити во ниската орбита на Земјата, кои ќе ги поврзе со сателитска мрежа за да обезбеди попрецизна навигација за автономните возила. Сателитите GeeSAT-1 беа лансирани од центарот на Ксичанг во Сечуан.

Geely најави дека очекува да лансира уште 63 сателити во орбитата до 2025 година, а на крајот би требало да има дури 240, пишува balkans.aljazeera.net.

Така, Geely стана вториот голем производител на автомобили во светот кој „работи“ во вселената. Имено, SpaceX, во сопственост на извршниот директор на Tesla, Илон Маск, има повеќе од 2.000 сателити во орбитата за мрежата Starlink, која нуди комерцијални интернет услуги.

Starlink планира да го зголеми нивниот број во првата генерација на мрежа на 4.408.

Додека SpaceX лансира сателити со свои ракети, Geely ги лансираше во средата со ракета Long March 2C развиена и управувана од кинеска државна компанија.

Покрај обезбедувањето поддршка за прецизно позиционирање на автономните автомобили, Geely рече дека неговата мрежа ќе служи и за други комерцијални функции, како што е обезбедување комуникациски услуги на Азиските игри во септември.

Сателитите имаат работен век од пет години, по што ќе се распаднат и ќе изгорат во земјината атмосфера, што значи дека нема да се претворат во отпад во вселената, додава кинеската компанија.

Војската во Кина доминира во секторот на сателитски мрежи, но владата го отвори и за приватни инвеститори во 2014 година. Компаниите покажаа голем интерес, некои со поддршка од локалните власти, фокусирајќи се главно на изградба на сателити.

Други се обидуваат да изградат мали лансери, вклучително и ракети за повеќекратна употреба. Пекинг најави интегрирана мрежа на комуникациски, далечинско набљудување и навигациски сателити во својот најнов петгодишен план за 2025 година.

Кина во моментов има повеќе од 400 сателити во вселената, вклучувајќи ги и оние кои се во сопственост на комерцијални компании, објавија државните медиуми.