Лендерот InSight, испратен на Марс од американската вселенска агенција NASA, го регистрираше најсилниот земјотрес на Црвената планета досега.

InSight слета на површината на Марс во ноември 2018 година со задача да собере информации за длабоката внатрешност на Црвената планета. Лендерот е опремен со сеизмометар наречен SEIS кој ги следи сите сеизмички активности. Досега се забележани повеќе од 1.300 мали земјотреси благодарение на сеизмометарот обезбеден од француската вселенска агенција CNES. Овој инструмент ги анализира промените на сеизмичките бранови додека минуваат низ кората, обвивката и јадрото на планетата. Со проучување на овие промени, научниците можат да ја одредат длабочината и составот на овие слоеви, а знаењето поврзано со Марс може да се примени за проучување на други небесни тела како Месечината, па дури и нашата Земја.

Неколку месеци по пристигнувањето на Црвената планета, лендерот InSight го пријави првиот земјотрес на Марс чија јачина одговара на 2,5 степени по Рихтер на Земјата. Сепак, научниците биле убедени дека на Црвената планета се случуваат посилни земјотреси и по повеќе од четири години добиле потврда. InSight забележа земјотрес со јачина од пет степени на Марс претходно овој месец.

„Откако го лансиравме сеизмометарот во декември 2018 година, го чекавме „тој голем“ земјотрес. Овој земјотрес ни дава увид во планетата како ниеден друг. Научниците ќе ги анализираат овие податоци и ќе научат нови факти за Марс“, рече Брус Бенерт, главен истражувач во програмата InSight во лабораторијата за млазен погон на NASA.

Последниот земјотрес го собори претходниот рекорд од 4,2 степени.

Исто како и другите, мисијата на NASA, InSight е ограничена и требаше да биде активна до 2020 година, но сега влегува во втората дополнителна година. Сепак, влијанијата на Марс го земаат својот данок бидејќи соларните панели на лендерот се во проблем. Зимата доаѓа на неговата локација и затоа ќе има малку сончева светлина, а причината е зголемување на количината на прашина на површината на планетата.

Неколку дена по регистрирањето на најсилниот земјотрес, InSight влезе во сигурен мод бидејќи неговото ниво на енергија падна под минимумот. Безбедниот режим е дизајниран да го заштити лендерот, а би можел повторно да се активира доколку дојде до нов пад на енергијата.