Microsoft официјално го објави Surface Duo 2, со нови функции и подобрено искуство на користење.

Како и оригиналниот уред, Surface Duo 2 има два 5,8-инчни OLED екрани со резолуција од 1892 x 1344p. Екраните се поврзани со помош на шарка и формираат 8,3-инчен дисплеј со брзина на освежување од 90Hz. Microsoft додаде и мало закривување по рабовите, со опција на преглед на пропуштените известувања, времето и друго. Двата дисплеја имаат Corning Glass заштита.

Surface Duo 2 го покренува Qualcomm Snapdragon 888 чипсет, а на уредот е додадена и поддршка за 5G. Покрај тоа, присутно е Qi безжично полнење и NFC поддршка.

Едно од најголемите подобрувања доби системот со камери. Новиот Surface Duo има систем со три камери и вклучува 16MP f/2.2 ултраширок сензор, 12MP f/1.7 широк сензор со OIS поддршка и 12MP f/2.4 телефото камера, која исто така поддржува оптичка стабилизација на сликата.

Како и другите Surface уреди, Duo 2 ќе има поддршка за паметното пенкало Surface Slim S Pen. Телефонот од старт го користи Android 11 оперативниот систем.

Microsoft објави дека Surface Duo е достапен во претпродажба на одредени пазари, по цена од 1.500 долари.