Џеф Безос, најбогатиот човек на светот, понуди да ги покрие трошоците на NASA во износ од две милијарди долари, со цел американската вселенска агенција да го преиспита потпишувањето на договор со него за изградба на возила за слетување на Месечината.

За потсетување, НАСА во април им го додели договорот на Елон Маск и неговата компанија SpaceX и ја одби понудата на Безос.

Договорот предвидува изградба на систем за слетување што би ги донел астронаутите на Месечината најрано во 2024 година, пренесува Би-Би-Си. Иако се очекуваше двете компании да соработуваат во проектот, NASA може да го додели договорот само на една поради недостаток на средства.

Од 3,3 милијарди долари што ги побара од Конгресот, NASA доби само 850 милиони долари за да изгради возило за да слета на Месечината. Безос рече дека со неговата компанија ќе го надмине недостатокот на буџетско финансирање.