Првиот хуманоиден робот во Кина, наречен Xueba 01, е примен на докторска програма по драмски уметности и филм на една од најпрестижните уметнички академии во земјата.
Роботот е заеднички развиен од Универзитетот за наука и технологија во Шангај и компанијата DroidUp Robotics, објави SCMP. Неговото име, Xueba (Sueba), е популарен кинески термин за исклучително успешен и посветен студент.
Според локалните портали, Xueba 01 е висок 1,75 метри, тежи околу 30 килограми и е способен за физичка интеракција со луѓе.
Има хуманоиден изглед со силиконска кожа што овозможува експресивни изрази на лицето и комуницира на мандарински јазик.
Поранешна верзија на овој робот учествуваше и го освои третото место на првиот хуманоиден полумаратон.
За време на Светската конференција за вештачка интелигенција, Шангајската академија за драмски уметности (STA) официјално го прифати роботот за четиригодишна докторска програма по драма и филм, со посебен фокус на традиционалната кинеска опера.
Роботот доби виртуелен индекс, а негов ментор ќе биде професорот Јанг Чингкинг, кој објави дека Xueba 01 ќе посетува часови со други студенти, ќе учествува на оперски проби и ќе напише финална докторска теза.
„Кога Xueba 01 го изведе познатиот гест „прсти од орхидеја“ моделиран по легендарниот уметник од Пекиншката опера Меи Ланфанг, студентите инстинктивно почнаа да го
имитираат“, рече професорот Јанг, додавајќи дека „интеракцијата со роботот не е ладна средба помеѓу човек и машина, туку естетска размена помеѓу видовите“.
Xueba 01 се опишува себеси како „уметник на вештачка интелигенција“ кој користи напредна технологија за да ја истражи традицијата на кинеската опера. Сепак, како што пишуваат кинеските медиуми, дел од јавноста ја поздрави веста со скептицизам.
„Кинеската опера бара богата експресивност и уникатен глас. Може ли робот навистина да го пренесе тоа?“ еден студент напиша на социјалните мрежи.
Поединци, исто така, покренаа практични прашања, наведувајќи дека „многу доктори на науки во Кина добиваат помалку од 3.000 јуани (околу 420 долари) месечно, а сега робот користи ресурси што можеа да им бидат доделени на вистински студенти“.