Windows 11 за прв пат стана најкористениот оперативен систем во светот, според најновите податоци од StatCounter за јули 2025 година.
Според статистичките податоци, Windows 11 сега го користат повеќе од 52 проценти од корисниците, додека уделот на Windows 10 падна на околу 44 проценти. Овој пресврт доаѓа само неколку месеци пред Microsoft официјално да ја прекине поддршката за Windows 10, закажана за 14 октомври 2025 година.
Како што се приближува крајот на поддршката за „десетката“, Microsoft го зголеми притисокот врз корисниците да се префрлат на поновиот систем – вклучувајќи сеопфатни пораки за надградба, промотивни кампањи и дополнителни безбедносни опции за бизнисите.
Исто така, речиси сите нови лаптопи и десктоп компјутери сега се продаваат со претходно инсталиран Windows 11, што дополнително го забрзува преминот кон новата верзија.
Windows 11 е сè попопуларен меѓу гејмерите, особено на платформата Steam, каде што новата верзија на оперативниот систем е веќе доминантна. Причината лежи во подобрата оптимизација за модерните графички картички, DDR5 меморијата и другите напредни технологии.
За корисниците кои сè уште користат Windows 10, се препорачува да размислат за надградба во наредните месеци за да останат заштитени и компатибилни со новиот софтвер. За постарите уреди кои не ги исполнуваат хардверските барања, Microsoft ќе понуди платени безбедносни закрпи преку програмата „Extended Security Updates“.