Huawei официјално го претстави својот нов оперативен систем HarmonyOS 3.0.

HarmonyOS првпат се појави во 2019 година по познатите санкции наметнати на Huawei, а потоа се појави друга верзија која достигна 90 милиони корисници до септември минатата година. Сега, HarmonyOS се користи на повеќе од 300 милиони уреди, а дополнителни повеќе од 170 милиони уреди ја користат платформата HarmonyOS Connect преку која компании од трети страни прават компатибилни уреди.

Huawei сега ја претстави третата верзија на својот ОС, која всушност веќе дебитираше со презентацијата на смартфонот Huawei MatePad Pro 11. Овој уред наскоро ќе се појави на меѓународните пазари, а новиот ОС носи поинаков изглед, подобрени виџети и мултитаскинг.

Форматот Universal Card widget е лесно приспособлив, овозможувајќи неколку форми, големини и стилови. Ова им овозможува да се групираат заедно кога има смисла, а виџетот автоматски ќе се приспособи на соодветната големина, меѓутоа, кога ги има премногу, тие може да се наредат еден врз друг, а потоа лесно да се манипулира.

Новиот ОС обезбедува можност за поврзување на два пара специфични слушалки, така што двајца луѓе можат да слушаат музика. Поврзувањето е важен дел од системот.

Кога станува збор за приватноста и безбедноста, новиот ОС следи колку често апликациите пристапуваат до локацијата, камерата, микрофонот, датотеките или контактите на корисникот. Покажува икона за да може корисникот да одлучи дали сака рачно да ги отповика дозволите за апликации, но системот може да го направи тоа автоматски. Исто така, го следи можното однесување на малициозните апликации, сомнителната мрежна активност и други закани. На недоверливите апликации може да им се дадат „лажни дозволи“ што им овозможуваат пристап до празни папки со фотографии или празно сандаче за SMS.

Системот има и едноставни алатки за отстранување на потенцијално чувствителни податоци при споделување фотографии, како што се податоци за времето и локацијата. Исто така, можно е да се скенираат слики од екранот и да се сокријат телефонски броеви, адреси и слично.

Huawei работеше на оптимизација, така што времето на започнување на апликациите и нивниот одговор е подобрено, а потрошувачката на енергија за време на игрите е намалена.

HarmonyOS 3.0 ја проширува основната идеја на системот, создавајќи „супер уреди“ кои се комбинација од два или повеќе паметни уреди кои работат заедно. Интерфејсот е едноставен, корисникот ги гледа поврзаните уреди како меурчиња и доволно е да помине еден преку друг за да се поврзе и да создаде „супер уред“.

Пример е уредувањето видео на Huawei MateBook, но со желба да се користи поголем екран. Ако имате достапен MateStation X, само повлечете ја иконата на мониторот преку иконата на лаптопот и потоа ќе биде активно безжично споделување екран.

Уредите што работат со HarmonyOS не треба да се поврзат на споделена WiFi мрежа за „магија на супер уред“, бидејќи тие се „чувствуваат“ еден со друг. Таблет Huawei што е блиску до мобилен телефон Huawei може да се користи за примање повици и исто така ќе прикажува СМС пораки. Исто така, истиот трик може да се користи за играње игри и гледање видеа на поголемиот екран на таблетот, иако содржината доаѓа од паметен телефон.

Мултимедијалното поврзување е проширено на паметните ТВ уреди со HarmonyOS. Можно е да користите два паметни звучници (Huawei Sound X) како стерео звучници за телевизорот. Исто така, ако бучавата не е посакувана, може да се користат пар слушалки TWS. Сè се поврзува со едноставен drag-and-drop интерфејс.

Екосистемот се прошири надвор од производите на Huawei. Компатибилна лента за трчање може да се поврзе со часовник Huawei за да се следи вежбањето и да се слуша музика.

HarmonyOS сега е присутен и во автомобилите, па на екранот на автомобилот е можно прикажување на апликации за паметни телефони, нешто слично на функциите на системот Android Auto. Исто така, истото важи и за паметните домашни уреди.

Huawei планира да започне со масовна надградба на постоечките уреди на HarmonyOS 3.0 во септември, а списокот на поддржани уреди допрва треба да биде објавен.