Суд во Франкфурт утврди дека Google дошол до снимки за своите онлајн-мапи преку „шпионирање“, бидејќи сопствениците на имоти не биле однапред известени дека сателити ќе ги фотографираат нивните домови.
Снимки од воздух на станбени објекти во Германија не смеат да бидат објавени на Google Maps доколку сопственикот се спротивстави на тоа.
Ова е пресудата на еден германски суд, кој одлучи во корист на сопственик на имот што го тужеше американскиот интернет-гигант поради користењето снимки од неговиот дом.
Човекот, кој поседува куќа во Франкфурт, претходно веќе успеа да издејствува заматување на приказот од предната страна на неговиот дом на виртуелните сервиси за преглед на улици.
Во овој најнов спор поврзан со сателитските снимки и услугите за мапирање на Google, Регионалниот суд во Франкфурт повторно пресуди во корист на тужителот. Судот утврди дека користењето снимки од воздух на неговиот имот, без негова согласност, е незаконско.
„Никој не би требало да прифати јавно објавување на снимки од воздух од имотот каде што живее, без негова согласност – особено кога тие снимки откриваат делови што инаку не се видливи за јавноста“, соопшти судот во вторникот.
Судот истакна дека снимките го опфаќаат и задниот дел од имотот, кој не е видлив за минувачите од улицата.
Судот заклучи дека компанијата дошла до снимките преку „шпионирање“, бидејќи сопствениците не биле однапред известени дека сателити ќе ги фотографираат нивните домови. Следствено, тие немале можност да ги скријат одредени делови од својот имот пред снимањето од воздух. Заклучокот е дека, во овој случај, Google не може да се повикува на слободата на информирање за корисниците на интернет.
Судиите признаа дека целта на компанијата – да придонесе кон демократизација на знаењето и транспарентно информатичко општество – е легитимна.
Сепак, оваа цел не го оправдува навлегувањето во приватната сфера на сопствениците на имоти.
Пресудата не е правосилна.