Новите Android телефони и други слични уреди наскоро ќе добијат значително зголемување на перформансите. Google објави детално објаснување за тоа како тоа ќе се постигне.
Android LLVM toolchain тимот на Google најави воведување на функција наречена Automatic Feedback-Directed Optimization (AutoFDO) во самото јадро на Android, што би можело да донесе огромен скок во перформансите на системот.
AutoFDO, кој за прв пат беше воведен во Android 12 (во 2021 година), е техника за оптимизација базирана на земање примероци. Користи податоци за извршување од реалниот свет, собрани директно од хардверски монитори, за да ги води одлуките на компајлерот. На овој начин, статичката анализа се заменува со профили што ја одразуваат вистинската употреба на уредот. Функцијата е слична на технологијата PGO (Profile Guided Optimization) што веќе се користи во Windows и Linux, како и во апликациите на Google базирани на Chromium.
Според Google, овој пристап му овозможува на компајлерот полесно да ги идентификува „жешките“ (hot) патеки на кодот – оние што се извршуваат најчесто – и да ги оптимизира соодветно. Овие профили се создаваат во контролирани лабораториски услови со извршување репрезентативни работни оптоварувања, кои ги вклучуваат 100-те најпопуларни апликации. Едноставно кажано, принципот е донекаде сличен на начинот на кој функционира кеширањето на податоци.
Google вели дека нивното истражување покажува просечно зголемување на перформансите од 10,5 проценти. Со оглед на тоа што јадрото на Android зафаќа околу 40 проценти од вкупното време на процесорот (CPU), резултатите се опипливи: 4 проценти покренување на апликацијата !од нула“ (cold launch) и 1 процент побрзо време на подигнување на системот (boot time).
Иако овие проценти не изгледаат огромни на хартија, Google тврди дека овие оптимизации се одлични за целокупното корисничко искуство, бидејќи се преведуваат во побрзо префрлување помеѓу апликациите, помазен интерфејс и подолго траење на батеријата.
Функцијата моментално е насочена кон верзиите на јадрото android16-6.12 и android15-6.6, а податоците се собирани на Pixel уреди. Google планира да ја прошири поддршката за поновите верзии на Generic Kernel Images (GKI) и други архитектури надвор од сегашниот aarch64.
Со усвојување на стратегија која е „конзервативна по дифолт“, Google вели дека се обидува да осигури дека AutoFDO ја зголемува брзината без да ја загрози сигурноста на самиот систем.