НАСА денеска соопшти дека ја одложува мисијата за испраќање четворица астронаути на патување околу Месечината, откако за време на проверката на ракетата биле забележани технички проблеми.
Менаџерите на мисијата спроведувале детална проба на лансирањето, позната како „wet dress rehearsal“ (симулација на лансирање со полнење гориво), во Вселенскиот центар Кенеди на Флорида, кога инженерите откриле истекување на водород во основата на ракетата Space Launch System, пренесе Ен-Би-Си њуз.
Поради тоа, НАСА била принудена да го прекине тестот нешто по полноќ по источноамериканско време, при што останувале околу пет минути и 15 секунди до симулираното одбројување за лансирање.
NASA completed a wet dress rehearsal for the Artemis II mission in the early morning hours on Feb. 3. To allow teams to review data and conduct a second wet dress rehearsal, NASA will now target March as the the earliest possible launch opportunity for the Artemis II mission.… pic.twitter.com/jSnCUPLQb6
— NASA (@NASA) February 3, 2026
Нешто по 2:00 часот наутро по источноамериканско време, НАСА соопшти дека се откажува од лансирањето на мисијата Artemis II околу Месечината, со цел тимовите да ги анализираат податоците и да изведат нова проба од типот „wet dress rehearsal“.
Според најавите, новото лансирање се планира најрано во март.
Агенцијата наведе дека на располагање има прозорци за лансирање од 6 до 9 март, како и на 11 март, а доколку биде потребно, и дополнителни датуми во април.
Претходната, беспилотна мисија Artemis I околу Месечината во 2022 година беше одложена за шест месеци поради истекување на водород, откриено за време на првата „wet dress rehearsal“ проба.
Со оглед на тоа што за првпат луѓе ќе летаат на ракетата Space Launch System и во капсулата Orion, влогот за мисијата Artemis II е исклучително висок.