Microsoft објави дека некои корисници можеле да ги решат техничките проблеми со неговите услуги откако ги рестартирале своите компјутери дури 15 пати.
Компанијата соопшти дека добила извештаи за некои случаи на „успешно закрепнување“ откако корисниците го рестартирале компјутерот повеќе пати, во некои случаи дури 15 пати.
Microsoft објави претходно денеска дека проблемот зад падот на неговите услуги е решен, но дека последиците од неуспехот што го наруши глобалниот бизнис и сообраќајот ќе продолжат да влијаат на некои корисници.
Ажурирањето на софтверот предизвика хаос во компјутерските системи ширум светот. Летовите беа откажани, некои медиуми мораа да престанат со емитување, а корисниците не можеа да пристапат до низа услуги, од банкарство до здравствена заштита.
Неуспехот се случи поради ажурирање на производот од глобалната компанија за сајбер безбедност CrowdStrike, што предизвика пад на оперативниот систем на Microsoft Windows низ целиот свет. Microsoft подоцна во петокот објави дека проблемот со неговите апликации и услуги е решен.
Извршниот директор на CrowdStrike, Џорџ Курц, напиша на платформата X дека компанијата „активно работи со клиенти погодени од грешка пронајдена во едно ажурирање на содржината за Windows host датотека“. „Ова не е безбедносен инцидент или сајбер напад“, нагласи тој.