Австралискиот премиер го нарече Илон Маск арогантен милијардер кога неговата платформа на социјалните мрежи „Икс“ го одложи отстранувањето на снимките од минатонеделниот напад во Сиднеј.
Вчера, австралискиот суд нареди „Икс“ (поранешен „Твитер“) да ги отстрани видеата од настанот. „Икс“ претходно најави дека ќе ја отстрани наведената содржина по законската одредба, пишува Би-би-си.
Сепак, Маск оттогаш објави меме, во кое ја обвинува владата за цензура. Затоа премиерот Ентони Албанес денеска изјави за „Еј-би-си њуз“ рече дека Маск е арогантен милијардер, кој мисли дека е над законот.
Минатата недела независниот интернет регулатор им се закани на „Икс“ и другите компании за социјални медиуми со високи казни доколку не ги отстранат видеата од нападот со нож во црквата „Христос добриот пастир“, кој полицијата го прогласи за терористички чин.
„Икс“ тврдеше дека оваа одредба не е во опсегот на австралиското право. Регулаторот потоа побара судска забрана за објавување на спорните снимки, а набргу дојде до расправија на социјалните мрежи и во медиумите.
„Би сакал да го искористам овој момент за да му се заблагодарам на премиерот што ѝ посочи на јавноста дека оваа платформа е единствената што ја покажува вистината“, напиша Маск. Тој претходно ја критикува австралиската комесарка за безбедност на интернет, Џули Инман Грант, опишувајќи ја како „австралиски комесар за цензура“.
Албанес застана во одбрана на Инман Грант велејќи дека таа ги штити граѓаните на Австралија.
„Социјалните медиуми мора да бидат и општествено одговорни. Ова не е случај со Маск“, додаде тој. X мора да ги отстрани спорните снимки во рок од 24 часа по одлуката на судот.