OnePlus во своите промотивни материјали изјави дека OnePlus 12R од 256GB користи складирање UFS 4.0, што не беше точно. Тие им нудат на клиентите целосен поврат на парите до 16 март.

OnePlus 12R во верзијата со 16GB RAM и 256GB внатрешна меморија е погрешно рекламиран. Имено, тој модел користи UFS 3.1 меморија, а не побрзиот UFS 4.0 како што беше првично наведено во промотивните материјали. Поради оваа причина, кинескиот производител им нуди на клиентите целосна исплата доколку одлучат да го вратат телефонот.

Официјално се огласи и претседателот на OnePlus, Киндер Лиу.

„Доколку сте купиле OnePlus 12R 256GB и сакате да разговарате за ситуацијата со типот на флеш меморија на вашиот телефон, ве молиме контактирајте со службата за корисници. Тие ќе ве водат низ следните чекори, вклучувајќи рефундирање до 16 март 2024 година“, рече Лиу.

Тој исто така рече дека OnePlus сè уште е уверен дека 12R ги исполнува високите очекувања на клиентите и дека на сите дефинитивно ќе им се допадне кога ќе го пробаат. Покрај тоа, тој се надева дека брзата реакција на компанијата во врска со овој случај ќе ја врати довербата кај некои клиенти.