Американската вселенска агенција ги заврши сите задачи потребни за лансирање на ракетата SLS, односно за мисијата Артемис 1, откако успешно го заврши клучниот тест со горивото.
НАСА мораше да го тестира додавањето на суперладено гориво во резервоарите на ракетата SLS за да потврди дека поправките го решиле проблемот што предизвика вториот обид за лансирање да биде напуштен кон крајот на август. Контролата на мисијата во вселенскиот центар Кенеди забележа постојано истекување на водород од една од линиите за гориво на ракетата SLS и се обиде да го реши проблемот три пати, но тимот на крајот не успеа и лансирањето беше одложено.
Неколку дена подоцна, беше утврдено дека истекувањето се случило кога главниот резервоар за засилување помина низ краток период на прекумерен притисок. За да спречи повторување на инцидентот, тимот ги приспособи процедурите за полнење на резервоарот за гориво за да вклучи побавни транзиции на температурата и притисокот за да нема брзи промени кои предизвикуваат протекување. Исто така, инженерите ги замениле пломбите откако откриле мала вдлабнатина на една од нив, што можело да придонесе за истекување.
Иако имаше уште едно истекување на водород за време на последниот тест, овој пат тимот успеа да го реши проблемот и да спроведе тест што го доведе притисокот на резервоарот за течен водород до нивото на кое ќе биде изложен пред вистинското лансирање.
Директорот на лансирањето на мисијата Артемис 1, Чарли Блеквел-Томпсон, рече дека тестот поминал „навистина добро“ и дека тимот можел да ги исполни сите цели. НАСА сега ќе ги анализира податоците пред да донесе одлука дали ќе ја лансира ракетата на 27 септември.