Наследникот на Audi R8 треба да се појави кон средината на оваа деценија, иако упатените во Audi велат дека суперавтомобилот се уште не добил официјално зелено светло.

Сепак, новитетот нема да се вика R8, а ќе се карактеризира со сосема нов дизајнерски правец за да не наликува на претходникот. Сепак, ќе остане верен на концептот на чистиот спортски автомобил, со две врати и поголема моќност од било што друго во гамата на Audi. Актуелниот R8 ќе остане во производство, најверојатно до крајот на 2023 година, според британскиот Autocar.

Шефот на Audi Sport Себастијан Грамс истакнува: „Она што се обидуваме да го направиме е да се доближиме што е можно поблиску до тоа врвно тркачко чувство“. Тој додаде дека 60% од неговите делови се слични на автомобилите со спецификации GT3. R8 се произведува заедно со моделите Audi E-tron GT и RS E-tron GT во фабриката на Audi Sport во Болингер Хофе во Германија, така што фабриката е веќе поставена за производство на врвни електрични модели.

Грамс рече: „Апсолутно ќе ја задржиме изработката бидејќи тоа е она што го прави автомобилот единствен од остатокот од портфолиото. Ако донесеме наследник на R8, ќе се обидеме да продолжиме да го правиме тоа. Тоа е важно за клиентот. Има љубов во R8“.

Audi има голем број на опции за платформа за наследникот R8, иако најверојатно ќе користи една развиена со Porsche. Платформата SSP Sport, неодамна потврдена од Porsche, ќе се користи за теренци и седани и ќе ја замени платформата J1 која моментално се користи кај Porsche Taycan и Audi E-tron GT.

Сепак, постои уште една можна основа за следната генерација на R8: платформата што Porsche ја подготвува за своите идни електрични модели, Porsche 718 Boxster и Cayman.

На темата платформи, Грамс рече: „Имаме брендови околу Volkswagen групацијата кои можат да постигнат синергија“.

Audi Sport веќе ја покажа својата моќ за електрични спортови со RS E-tron GT, кој забрзува од 0-100 km/h за 3,3 секунди и испорачува 637 КС, со опсег од 237 милји (381 km) и можност за брзо полнење. Идниот R8 ќе треба да ги надмине овие бројки, како и да има доволно моќ и опсег за возење на патеката.

„Мораме да бидеме храбри, како што бевме со првата генерација R8. Беше храбра одлука да се направи тој автомобил. Мораме да бидеме иновативни и да се трансформираме во електричен свет и дигитализација“.

Пристигнувањето на наследникот R8 ќе биде внимателно темпиран за да ги предводи плановите на Audi да лансира само електрични модели во основната линија од 2026 година, иако стратегијата за моделите Audi Sport е малку поинаква.

Зборувајќи за претстојниот модел, Грамс рече: „Јас се борам за [наследникот на R8], а исто така и раководството на Audi. Разгледуваме различни видови концепти, а насоката е електрифицирана. Ако ми се исполни желбата, тоа ќе биде електричен R8. И ако се занимавате со суперспортски автомобил, тогаш тоа е концепт со две врати“.

Новиот Audi TT е уште еден популарен модел на Audi Sport што се разгледува. „Работиме на тоа“, вели Грамс. „Тоа е икона. Но, во моментов, мојот фокус е наследникот на R8“.