Во 2017 година, кинеската влада понуди да инвестира 100 милиони долари за изградба на кинеска градина во Вашингтон, но американските разузнавачи набрзо сфатија дека тоа е обид за шпионирање на американскиот одбранбен систем.

Заедно со храмови и павилјони, проектот ги возбуди локалните власти, кои се надеваа дека ќе привлече илјадници туристи секоја година, но кога претставниците на контраразузнавањето на САД почнаа да копаат во деталите, тие се загрижија. Проектот би бил стратешки поставен на една од највисоките точки во Вашингтон, совршено место за собирање разузнавачки информации, пренесува CNN.

Алармантен е и податокот дека кинеските функционери сакале да изградат пагода од материјал кој бил доставен во САД преку дипломатски пратки, а кој на американските цариници им било забрането да го прегледаат.

Федералните власти тивко го стопираа проектот пред да започне изградбата. Откажаниот проект за градина е дел од контраразузнавачките напори на ФБИ и другите федерални агенции фокусирани на она што беше драматична ескалација на кинеската шпионажа на американско тло во изминатата деценија.

Од 2017 година, федералните власти ги истражуваа набавките на земјиште во близина на критичната инфраструктура, затворија регионален конзулат од висок профил за кој американската влада верува дека е жариште на кинески шпиони и ги спречија, според нив, јасните напори за поставување уреди за слушање во близина на чувствителни воени и државни објекти .

Меѓу најалармантните работи што ФБИ ги откри е кинеската опрема на Huawei на врвот на кулите во близина на американските воени бази.

ФБИ утврди дека опремата е способна да ги пресретне и да ги попречи комуникациите на Министерството за одбрана, вклучувајќи ги и оние што ги користи Стратешката команда на САД, која го надгледува нуклеарното оружје на земјата.

Иако е добро позната широко распространетата загриженост за опремата на Huawei во близина на американските воени инсталации, постоењето на оваа истрага и нејзините наоди никогаш не беа објавени во јавноста. Нивното потекло датира барем од администрацијата на Обама. Повеќе од десетина извори, вклучително и сегашни и поранешни функционери за национална безбедност, кои зборуваа под услов да останат анонимни, го потврдија ова за Си-Ен-Ен.

Не е јасно дали разузнавачката заедница утврдила дека било какви податоци навистина биле пресретнати и испратени во Пекинг од тие кули.

Извори запознаени со ова прашање велат дека од техничка гледна точка е неверојатно тешко да се докаже дека пакетот со податоци бил украден и испратен во странство, а кинеската влада категорично негира какви било активности за шпионирање на САД.

Во изјава за CNN, Huawei исто така негираше дека неговата опрема е способна да работи во кој било комуникациски спектар доделен на Министерството за одбрана на САД.