Apple поднесе барање за три патенти за контролери наменети за играње видео игри на телефоните и таблетите на компанијата.

Тековните планови на Apple на пазарот за видео игри се поврзани со услугата за претплата Arcade на компанијата, која беше претставена во 2019 година и не ги воодушеви премногу корисниците. Хардверот, телефоните и таблетите на Apple имаат голем потенцијал за покомплицирани игри, но екранот на допир не е доволно добар за да им овозможи на корисниците целосно уживање и супериорно искуство во играњето.

За тоа се свесни и Apple, па размислуваат за начините на кои би можеле да го променат или подобрат тоа искуство, а патентите за кои аплицирале на европскиот пазар ја откриле насоката на нивното размислување. Според нив, Apple размислува за три типа на контролери кои би можеле да се поврзат со нивните производи и да управуваат со игрите преку нив.

Првиот модел, чии скици се објавени, е сличен на класичните контролери што се користат за PlayStation и Xbox, а би се поврзувал со телефони и таблети преку Bluetooth. Исто така, таков контролер би бил компатибилен со Apple TV, како и со Mac, за да може да се користи за контрола на игри на компјутери.

Вториот тип на контролер изгледа многу поинтересен за корисниците на телефоните на Apple и потсетува на контролорите на Nintendo за Switch. Со помош на магнети, два контролери ќе можат да се поврзат со рамките на телефоните или таблетите и потоа, како на Switch, да се користат во игрите.

Третиот тип на контролер, за чиј патент е поднесенo барање, се става во футрола и кога не се користи, со него може да се покрие екранот – слично како Magic тастатурата на Apple, само што наместо тастатура има контроли за управување на играта. Исто така, патентот покажува како таква футрола може да се користи како секундарен екран на кој би можеле да се програмираат софтверски тастери. Apple размислува само за овој тип на контролер за iPhone.

Пријавата на патентите, секако, не мора да значи дека Apple ќе започне со нивна реализација и дека компанијата навистина ќе ги претстави сите три или само еден или два споменати контролери. Но, бидејќи постојат некои предвидувања дека пазарот на игри би можел да вреди дури 260 милијарди долари до 2025 година, не е тешко да се заклучи дека и компанијата на Тим Кук сака дел од тој „колач“.