Facebook ја воведе својата функција за создавање кратки видеа – Reels на глобално ниво, соопштија од компанијата Meta. Ова е потег да го прошири својот најбрзо растечки формат на содржина по написите дека бројот на корисници е намален, пишува Гардијан.
Гигантот на социјалните мрежи, кој неодамна најави масовно пренасочување кон производите за виртуелна реалност, изгуби третина од својата пазарна вредност по лошиот извештај за заработката во февруари. По ова, компанијата ги истакна Reels како клучен приоритет за помладите корисници.
Фокусот на Reels доаѓа бидејќи помладите корисници се собраа во голем број на ривалски платформи како TikTok. Внатрешното истражување на Meta, објавено од поранешната вработена и „свиркач“ Френсис Хауген, покажа дека младите корисници се во опаѓање од 2012 година и „само корисниците на возраст од 25 години и повеќе ја зголемуваат употребата на Facebook“.
Reels опцијата веќе беше достапна во САД и на други места, но сега ќе се прошири во вкупно 150 земји и ќе биде поизразена на апликациите Facebook и Instagram. Алатката за видео, исто така, ќе понуди повеќе функции за уредување и споделување, вклучително и дозволување на корисниците да ги „ремиксираат“ видеата на другите за да додадат свој коментар.
Meta ја воведе опцијата за Reels на Instagram во 2020 година и на Facebook во 2021 година како одговор на масовно популарната апликација за кратко видео TikTok, која е во сопственост на кинескиот технолошки гигант Byte Dance.
Сепак, функцијата која речиси е копија на ривалската платформа, предизвика критики и обвинувања за антиконкурентно однесување, бидејќи Facebook има историја на позајмување клучни карактеристики на своите најголеми ривали.
„Reels е веќе нашиот најбрзо растечки формат на содржина досега, а денес го правиме достапен за сите на Facebook на глобално ниво“, напиша вчера извршниот директор на Meta, Марк Цукерберг во објава на Facebook.
Компанијата, која вели дека видеото сега сочинува половина од времето што луѓето го поминуваат на Facebook, најави и нови начини за креаторите да заработат преку функцијата Reels.
Оттаму велат дека ја прошируваат својата програма за да дава бонуси на креаторите во повеќе земји и дека тестира реклами со преклопување со помош на банери и налепници за креаторите да заработат приходи од реклами. Наскоро ќе воведе и реклами на цел екран помеѓу Reels.