Комбинацијата на различни видови вакцини за коронавирус значително го зголемува создавањето на имунитетот, објави германски универзитет.
„По истражувањето спроведено на 250 лица кои ја примија ‘Астра зенека’ како прва вакцина и ‘Бонтек/Фајзер’ како втора, беше забележано зајакнување на создавањето на имунитет, за разлика од оние кои ги примија двете дози на ‘Астра зенека’“, се вели во соопштението на Универзитетот во Саарбрикен.
Авторите на студијата, кои, според нивните сопствени изјави, биле изненадени од недвосмислениот резултат, препорачуваат вакцинација со различни видови вакцини.
Според научниците од Универзитетот, сегашната студија треба да се продлабочи, со цел да се добијат нови знаења за ефективноста по пол или возраст.
Откако Германската федерална комисија за вакцинација препорача на почетокот на април лицата под 60 години да не бидат вакцинирани повеќе со „Астра зенека“, се појави проблем кај луѓето кои веќе ја примиле како прва вакцина. На крајот им беше препорачано да се вакцинираат со „Фајзер“ или со „Модерна“.