Тајванскиот производител Foxconn испитува наводна измама што вклучува продажба на iPhone уреди со неисправни компоненти. Според „Тајван њуз“, измамниците продале неисправни iPhone смартфони за околу 1,3 милијарди тајвански долари (43 милиони долари) за период од три години.
Foxconn е еден од најголемите производствени партнери на Apple, и е одговорен за склопување голем број производи на популарниот бренд во САД. За време на производниот процес, некои од компонентите се отфрлаат заради неисполнување на критериумите за квалитет. Ова е вообичаена практика на сите компании.
Според нормалната процедура на работа на Apple, неисправните компоненти на iPhone мора да бидат уништени. Во овој случај, сепак, некои директори на Foxconn биле вклучени во измамничка шема со овие компоненти, во која биле вклучени тајвански бизнисмени.
Наместо да бидат уништени, неисправните компоненти биле користени за склопување на iPhone уредите. Овие паметни телефони потоа биле продавани како оригинални легални производи на Apple. Иако шемата работи веќе неколку години, Apple го открил случајот дури во јуни оваа година.