Новиот извештај на Пентагон за закани во вселената предупредува дека Кина и Русија се способни да ја загрозат извонредната позиција на САД вклучувајќи ги и ласерите што би можеле да ги нападнат и уништат американските сателити.
„Кина и Русија развиваат разни средства за да ја оспорат позицијата на САД во вселената“, се вели во извештајот на Aгенцијата за воено разузнавање.
Извештајот, објавен во понеделникот, е со наслов „Предизвици за безбедноста во вселената“ и ги испитува способностите на Русија, Кина, Иран и на Северна Кореја.
Американските сателити играат важна улога во сè, од навигацијата, таргетирањето оружје и собирањето разузнавачки информации, вклучувајќи ги и контролата на програмата за нуклеарно оружје на Северна Кореја и следењето на воената активност на Русија и Кина. Тие исто така располагаат со сензори вклучени во откривањето на непријателските проектили.
Извештајот доаѓа кога кинеската влада сè повеќе ја засилува својата вселенска програма станувајќи прва нација што во јануари слета на најодалечената страна на Месечината. Растот на способностите на Кина во вселената и потребата да се заштитат американските сателити биле наведени од страна на администрацијата на Трамп како причина зошто на САД им требаат вселенски сили.
Министерството за надворешни работи на Кина допрва треба да одговори на новиот извештај на САД.