Tesla Motors ја заврши инсталацијата на најголемата литиум-јонска батерија во светот. Станува збор за батеријата Tesla Powerpack која е поставена во државата Јужна Австралија и која има капацитет кој е доволен да обезбеди електрична енергија за 30.000 домови во случај на исклучување на електричната мрежа.
Според информации од компанијата, завршните тестови на најголемата батерија во светот ќе се одржат наскоро. Моќноста на батеријата ќе се вклучи за неколку дена. Финалните тестови ќе им помогнат на експертите во областа да се осигураат дека батеријата ги исполнува барањата на владата на Јужна Австралија, како и на компанијата која го контролира енергетскиот пазар во земјата.
Покрај тоа, се очекува батеријата да почне да обезбедува електрична енергија од 1 декември. Tesla Powerpack се наоѓа во близина на Џејмстаун и ќе се полни од ветерната фарма Хорнсдејл. Се очекува батеријата да работи континуирано, поддржувајќи ја енергетската инфраструктура на државата во случаи на прекини.