Microsoft ја откри причината за глобалниот прекин што минатата недела ги парализираше Outlook, Exchange и низа други клучни канцелариски апликации. Во првичниот извештај објавен во понеделникот, технолошкиот гигант наведе дека 24-часовниот прекин во работата на услугите бил предизвикан од три фактори: долготрајна програмска грешка (баг), неисправни внатрешни врски и недоволен капацитет на серверите.

Од Microsoft истакнаа дека, иако секој од овие проблеми можел да се реши поединечно, нивната комбинација довела до пад на системот кој било тешко да се запре, пренесува „Гардијан“.

Сериозни последици од падот на системот
Проблемите започнаа во четвртокот, кога корисници во САД пријавија потешкотии при пристапот до Outlook. Прекинот продолжи и следниот ден, оставајќи милиони луѓе ширум светот без можност да користат е-пошта и други услуги од пакетот Office 365.

Последиците беа сериозни: затворите не можеа да ја спроведат процедурата за ослободување на затвореници, болниците се вратија на документација во хартиена форма, училиштата изгубија контакт со родителите, а полицијата не можеше да прима пријави за кривични дела. Од Microsoft соопштија дека проблемот е решен и услугите се вратени во функција до саботата, при што упатија извинување до своите корисници. Компанијата нагласи дека инцидентот не бил резултат на хакерски напад.

Објаснување за техничките причини
Чарлс Ламана, корпоративен потпретседател за Copilot, агенти и платформи во Microsoft, во понеделникот на платформата X изјави дека „скриена грешка“ (latent bug), која датира уште од јули, предизвикала преоптоварување на серверите, што довело до пад на услугите. Ламана објасни дека компанијата вообичаено користи два „влеза“ (gateway) за поврзување на различни системи; меѓутоа, еден од нив престанал да функционира за Microsoft Teams, што го преоптоварило главниот влез. Дополнително, повеќе од 14% од капацитетот на серверите бил надвор од функција поради друг, неповрзан проблем од претходниот ден.

„Поради зголеменото оптоварување и намалениот капацитет на серверите, мрежниот премин активираше скриена грешка што датира од јули“, напиша Ламана. „Ова предизвика натрупување на барањата, а серверите на крајот престанаа да одговараат. Целиот инцидент се случи за време на периодот на најголем сообраќај во Соединетите Држави.“

Тешкотии при обновувањето на системот
Компанијата се соочи со предизвици при решавањето на падот, бидејќи коренот на проблемот потекнувал од пред неколку месеци. Ламана појасни дека грешката не можела едноставно да се отстрани со враќање на системот на претходна верзија. „Закрепувањето траеше подолго од вообичаено бидејќи, штом серверите повторно се вклучија, тие веднаш беа преоптоварени од натрупаниот сообраќај“, напиша тој.

„Нашите стандардни автоматизирани процеси за закрепнување не се дизајнирани за состојба на целосна неактивност на системот. Бидејќи основната причина беше грешка (баг) што постоела неколку месеци, не можевме брзо да ја поништиме промената користејќи конвенционални методи.“ Компанијата планира да објави конечен извештај со дополнителни детали.

Ризикот од потпирање на еден единствен систем
Аналитичарите посочуваат дека овој прекин во работата ги истакнува опасностите за компаниите кои премногу се потпираат на еден единствен оперативен систем. „Ова е одличен пример за важноста не само на сајбер-отпорноста, туку и на деловната отпорност“, изјави Мет Хал, потпретседател за сајбер-разузнавање во „NCC Group“.

„Извештаите за погодените болници, училишта и други витални служби покажуваат какво значително влијание може да има прекинот во работата на системот, без оглед на причината.“