Крај на една ера: ЕА ја отстрани серијата на FIFA од продавниците

EA Sports го отстрани речиси целиот каталог на видео игри на FIFA од дигиталните продавници.

Добивај вести на вибер

Повеќето видео игри на FIFA се отстранети од сите дигитални продавници, вклучувајќи ги Steam, Epic Games Store, PlayStation Store, Microsoft Store и Nintendo eShop.

Ова „чистење“ ги вклучува сите главни наслови од FIFA 14 до FIFA 23, од кои последната беше објавена минатата година. Сепак, изгледа дека FIFA 22 и FIFA 23 сè уште можат да се играат на EA Play, за што е потребна претплата.

Ако отидете на официјалната веб-страница на FIFA 23, ќе видите известување дека видео играта сега е достапна на EA Play, но кога ќе кликнете за да отидете и да ја купите од една од дигиталните продавници, ќе добиете празна страница.

Во меѓувреме, Steam објави известување за отстранување, но не и причините за овој потег.

„На барање на издавачот, EA SPORTS FIFA 23 не е наведен во продавницата на Steam и нема да се појави во пребарувањето“, се вели во соопштението.

ЕА се раздели со франшизата на FIFA во 2022 година, и како резултат на тоа, FIFA 23 е последен во серијата титули означени со FIFA по 30 години соработка. Во иднина, фудбалските игри на овој креатор ќе се викаат EA Sports FC.