Заедно со 13,6-инчниот MacBook Air, Apple на пролет би требало да ја претстави својата поголема варијанта која ќе доаѓа со екран од 15,5 инчи.
Новинарот на Bloomberg, Марк Гурман уште во јуни оваа година објави дека Apple работи на поголем модел на MacBook Air, а сега Рос Јанг го сугерира тоа. Според неговите извори, технолошкиот гигант од Купертино ќе започне со производство на панели веќе во првиот квартал на 2023 година, што сугерира дека поголемиот Air би можел да биде претставен во текот на пролетта.
Слична претпоставка имаше и Гурман, што значи дека најголемото освежување за MacBook Air од неговото прво издание во 2008 година е навистина на пат. Јанг, сепак, даде повеќе детали, па вели дека новиот лаптоп на Apple нема да има 15-инчен, туку 15,5-инчен екран, кој ќе коегзистира со „стандардниот“ од 13,6 инчи, пишува 9to5Mac.
Како што претходно се шпекулираше, останатите спецификации треба да останат исти, што значи дека 15,5-инчниот MacBook Air ќе биде само поширока верзија на 13,6-инчниот M2 модел, кој Apple го претстави на овогодинешниот WWDC.
Потсетуваме дека во средината на годината се зборуваше дека Apple активно работи на 12-инчен лаптоп, кој треба да биде претставен следната или на почетокот на 2024 година. Засега нема детали, па не се знае дали тој лаптоп ќе биде дел од линијата Air или Pro, но интересно е да се истакне дека компанијата својот последен 12-инчен лаптоп го претстави уште во 2015 година.