Google подготвува неколку корисни подобрувања за Google Wallet, вклучително и можност за скенирање сметки директно во апликацијата.
Во најновото ажурирање на Google Play Services (верзија v26.40), Google најави четири подобрувања за Google Wallet и Google Pay. Најзначајниот новитет е можноста за скенирање сметки директно во Google Wallet, што би требало да го олесни нивното чување и следење.
Оваа нова функција би можела да ја елиминира потребата за рачно внесување на податоците од сметките. Сепак, Google сè уште нема објавено конкретни информации за тоа како функционира оваа опција, ниту пак е познато кога таа ќе биде достапна за сите корисници.
Промени се очекуваат и кај Google Pay во рамките на прелистувачот Chrome за Android. При споделување на своето име, адреса на е-пошта и телефонски број со трговците, корисниците ќе можат да го заобиколат интерфејсот Payment Request, што потенцијално ќе го забрза процесот на плаќање.
Google Wallet исто така ќе вклучува подобрени известувања за трансакциите, при што имињата на трговците ќе бидат прикажани појасно. Ова би требало да го олесни препознавањето на местата каде што е користена картичката и да им овозможи на корисниците подобар преглед на нивните трошоци.
Дополнително, апликацијата добива и внатрешен центар за пораки. Google сè уште нема прецизирано какви пораки ќе се појавуваат таму, ниту пак како ќе биде организиран овој дел.
Иако за повеќето од овие нови функции недостасуваат детални објаснувања, овие подобрувања укажуваат на намерата на Google да го направи Wallet попрактичен за секојдневна употреба – особено во однос на следењето на трошоците и управувањето со дигиталните плаќања.