Roblox, платформа со огромен број малолетни корисници, со години се соочува со сериозни проблеми со безбедноста на децата. По низа тужби, се воведуваат драстични мерки.
Сите корисници кои сакаат да ги користат функциите за разговор ќе мора да ги скенираат своите лица. Автоматизиран систем ќе ја процени возраста на корисникот и ќе дозволи комуникација само со играчи од соодветната возрасна група.
Разговорите ќе бидат ограничени во зависност од возраста, но овие правила важат само за комуникација со непознати играчи.
Корисниците над 13 години сè уште ќе можат да комуницираат без ограничувања со луѓе на нивната листа на пријатели, или таканаречени Trusted Connections.
Системот бара од корисникот да гледа директно во камерата и да го сврти лицето лево и десно, што ја намалува можноста за злоупотреба на туѓи документи или фотографии.
Roblox признава дека системот не е совршен, но нагласува дека ова е првиот важен чекор кон побезбедна средина за децата на платформата.