Европската комисија започна три пазарни истраги за cloud услуги, од кои две се однесуваат на американските компании Amazon и Microsoft и нивната пазарна позиција во ЕУ.
Истрагите ќе проценат дали Amazon и Microsoft спаѓаат во категоријата „чувари на порти“ (gatekeepers) според Законот за дигитални пазари (DMA), т.е. компании кои го контролираат пристапот до клучни дигитални платформи или услуги и со тоа имаат значителна пазарна моќ.
Amazon и Microsoft формално не ги исполнуваат сите критериуми на DMA за „чувари на порти“ во cloud сегментот, но се сомнева дека имаат доволно влијание за да контролираат како другите бизниси пристапуваат до cloud ресурсите и со тоа непропорционално силна пазарна позиција.
Cloud работењето е основа на многу дигитални услуги и е клучно за развојот на вештачката интелигенција.
Комисијата нагласува дека на Европа ѝ е потребна фер, отворена и конкурентна средина за да се поттикне иновацијата и довербата на пазарот, според веб-страницата на ЕК.
Доколку Amazon и Microsoft бидат назначени за „чувари на порти“, тие ќе имаат поголеми обврски кон конкуренцијата и ќе мора да дозволат пристап до своите платформи и услуги на други компании.