OpenAI, предводена од извршниот директор Сем Алтман, неодамна потпиша договор за изградба на еден од најголемите центри за податоци за вештачка интелигенција во светот во Абу Даби.
Проектот вклучува конзорциум од истакнати американски технолошки компании и претставува значаен чекор во плановите на Обединетите Арапски Емирати за диверзификација на нивната економија преку инвестиции во напредна технологија.
Сепак, зад сцената, Елон Маск активно се обидува да го спречи остварувањето на договорот, освен ако неговата компанија xAI не биде вклучена во проектот.
Спорот настана пред посетата на Трамп на неколку земји од Персискиот Залив кон средината на мај. Маск, откако дозна дека Алтман ќе биде присутен и дека се подготвува голем проект во ОАЕ, го изрази своето незадоволство од договорот.
Маск ги предупреди претставниците на G42 – компанија за вештачка интелигенција контролирана од братот на претседателот на ОАЕ – дека иницијативата нема да добие претседателско одобрување доколку не биде вклучена xAI. „Волстрит џурнал“ потврди дека Маск ги предупредил присутните дека претседателот Трамп нема да го поддржи проектот за центарот за податоци во Абу Даби доколку неговата компанија xAI не биде дел од договорот, објави „Баг“.
И покрај приговорите на Маск, администрацијата на крајот одлучи да продолжи со проектот, а помошниците најдоа начини да го „смират“ Маск. Портпаролката на Белата куќа, Каролин Ливит, го опиша исходот како „уште една добра зделка за американскиот народ, благодарение на претседателот Трамп и неговиот извонреден тим“.