Адвокатската канцеларија WBS Legal, исто така, подготви бесплатен формулар за барање кој е достапен за корисниците на Netflix.
Netflix постојано ги зголемуваше цените на претплатите во последните неколку години. Но, според пресудата на Окружниот суд во Келн, тие зголемувања не биле правно валидни, што би можело да има големи последици за милиони корисници, како што објави списанието „Феникс“.
Корисник кој претходно плаќал Premium претплата од 11,99 евра месечно, а сега плаќа 17,99 евра, поднел тужба со поддршка на правната агенција WBS Legal, предводена од познатиот медиумски адвокат Кристијан Солмеке. На 15 мај 2025 година, судот пресуди во корист на корисникот.
Според таа пресуда (број на предмет 6 S 114/23), Netflix нема право еднострано да ги менува цените без изрична и информирана согласност од корисниците. Исто така, компанијата е должна да им ги врати сите преплатени износи на корисниците од 2019 година па наваму. За жал, барањата за 2017 и 2018 година се веќе застарени. Пресудата стана правосилна бидејќи жалбата беше одбиена. Судот јасно нагласи дека кликот на копче во апликацијата или пораката од Netflix не е доволен за да се смета дека корисникот се согласил со новата цена. Многу корисници, според толкувањето на судот, верувале дека станува збор само за известување, а не за предлог за нов договор.
„Прашањето не е дали некој кликнал на копчето, туку дали тој клик бил свесна согласност. Ако Netflix создава впечаток дека цената ќе се зголеми без оглед на сè, не може да се крие зад копчето за согласност“, вели адвокатот Солмеке. Корисникот кој поднел жалба ќе добие околу 200 евра назад. Милиони други корисници во Германија кои плаќаат повисока цена од првично договорената, сега можат да побараат враќање на преплатениот износ.
Адвокатската канцеларија WBS Legal, исто така, подготви бесплатен формулар за барање („Musterschreiben“) што корисниците можат да го користат за да побараат враќање на средствата од Netflix.
Netflix веројатно не планира автоматски да им враќа пари на милиони корисници. Доколку Netflix не одговори на барањето, корисниците, како тужителот во овој случај, ќе мора да поведат судска постапка за да ги остварат своите права.