Американскиот претседател Доналд Трамп во неделата изјави дека неговата администрација е во контакт со четири различни групации во врска со продажбата на кинеската социјална мрежа TikTok и дека сите четири опции се задоволителни.
Судбината на TikTok во САД е неизвесна од јануари оваа година поради законот кој бара сопственикот ByteDance да ја продаде популарната социјална мрежа на американски купувач, во спротивно ќе биде недостапна за американските корисници.
Законот беше усвоен од администрацијата на поранешниот претседател Џо Бајден, загрижена за кинеската контрола врз споменатата мрежа, поради што тие го гледаа како сериозна закана за националната безбедност.
Покрај тоа, САД тогаш изразија загриженост дека кинеските власти би можеле да ја користат огромната база на податоци на TikTok за вознемирување, регрутирање, шпионажа или манипулација со јавното мислење.
Законот стапи на сила на 19 јануари, последниот ден од мандатот на Бајден, кога Американците не можеа да влезат на TikTok. Но, веќе следниот ден, новиот претседател Трамп потпиша извршна наредба со која се одложува спроведувањето на законот за 75 дена.
Трамп им рече на новинарите дека наскоро може да се постигне договор во врска со ситуацијата со TikTok. „Имаме работа со четири различни групации, многу луѓе го сакаат тоа… сите четири се добри“, додаде тој.
TikTok и ByteDance не ги коментираа прашањата на Ројтерс.
Превирањата околу социјалната мрежа што ја користат речиси половина од Американците привлекоа неколку потенцијални купувачи, вклучувајќи го и поранешниот сопственик на франшизата за бејзбол ЛА Доџерс, Френк Мекорт. Аналитичарите ја проценуваат вредноста на брзорастечкиот бизнис на околу 50 милијарди долари.