Владата на Обединетото Кралство побара од американската технолошка компанија Apple да и обезбеди пристап до сите шифрирани кориснички податоци во облакот.
Британските претставници побараа Apple да создаде таканаречена „backdoor“ или можност да се заобиколи нормалната верификација или шифрирање на идентитетот, со цел да се пристапи до информации од облакот, пишува Вашингтон пост, повикувајќи се на анонимни информирани извори.
Владата во Лондон побара целосен пристап до податоците на сите корисници во облакот на Apple, а не само помош за пристап до сметките на одредени поединци.
Британската влада сака во секое време да има пристап до сите шифрирани кориснички податоци ширум светот, пишува американскиот весник.
Вообичаено е владите ширум светот да бараат од технолошките компании податоци кои се важни во криминалните истраги, но британското барање е без преседан во демократските земји, додава Вашингтон пост.
Apple, според американскиот весник, го одбил ова барање и најверојатно повеќе нема да нуди опција за шифрирано складирање на податоци во Велика Британија.
При поднесувањето на ова барање, Британија се повика на својот Закон за извршни овластувања од 2016 година, кој комбинира различни постоечки овластувања за пресретнување на комуникациите, пренесува Ројтерс.