Apple има намера да започне масовно производство на новата генерација на AirPods опремени со вградени камери. Потенцијалните апликации се многубројни и многу интригантни, а заканата за приватноста е уште поголема.
Неодамнешната истрага за синџирот на снабдување од страна на аналитичарот и најголем дојавувач на Apple, Минг-Чи Куо, нуди увид во идните планови на Apple за AirPods.
Тој во својот блог пост сугерира дека Apple има намера да започне масовно производство на новата генерација на AirPods опремени со вградени камери до 2026 година. Новиот дизајн се очекува да вклучува технологија на инфрацрвена камера, слична на системот Face ID што се наоѓа кај iPhone и iPad.
Наводно, Foxconn е избран за првичен снабдувач на овие IR камери, со очекуван годишен капацитет за производство од 18 до 20 милиони единици. Тоа значи околу 10 милиони AirPods, иако вистинскиот број ќе зависи од побарувачката на пазарот.
Примената е интригантна
Потенцијалните примени на овие AirPods опремени со камера се интригантни. IR камерата може да го отвори патот за контрола на движењето во воздухот. Тоа би им понудило на корисниците сосема нов начин на интеракција со нивните уреди, што потенцијално ќе донесе нови можности за интеракцијата човек-компјутер.
Во минатото, Apple поднесе неколку патенти кои навестуваа токму таква технолошка визија. Исто така, намерата е да се подобри просторното слушање во комбинација со Apple Vision Pro уредот. Во исто време, се шпекулира дека камерите би можеле да го следат движењето и да градат мапи за движење. Во секој случај, денес е вообичаено корисниците да носат слушалки на главата речиси секој ден, па камерите имаат смисла за многу други, засега непознати, примени.
Секако, оние кои секогаш се грижат за приватноста ќе имаат многу да се жалат кога и како ќе се користат овие камери.
Се гради уште поцврст ѕид
Воведувањето на AirPods опремени со камера означува уште еден од постојаните напори на Apple да го зајакне својот екосистем и да ги поврзе хардверот, софтверот и услугите. Некои ќе го протолкуваат ова како изградба на уште посилен ѕид околу дигиталната градина на Apple.
Важно е да се напомене дека Apple, за разлика од iPhone, не се придржува до строг распоред за презентација на новите AirPods уреди. Иако гласините сугерираат дека новите AirPods би можеле да бидат претставени блиску до лансирањето на iPhone во септември 2024 година, овие слушалки нема да имаат револуционерен систем за IR камера.