Рускиот претприемач Павел Дуров првпат ја претстави на светот апликацијата Telegram пред 10 години, која ја дочека својата годишнина со 800 милиони активни корисници.
Оваа апликација во јули ја користеле просечно 54,3 милиони луѓе на дневна основа, со што за прв пат успеале да ја престигнат руската социјална мрежа VKontakte, чиј основач е исто така Дуров, пренесува Комерсант.
Telegram го користат 81,2 милиони граѓани на Русија, кои ја нарекуваат „Teljega“.
На растот на бројот на корисници на оваа апликација значително влијаеше почетокот на конфликтот во Украина, бидејќи Telegram го користеа 27,5 милиони корисници дневно во февруари 2022 година, а 40,6 милиони луѓе веќе следниот месец.
Telegram доби 100 милиони активни корисници две и пол години по лансирањето, а луѓето често се префрлаа на оваа платформа поради блокирањето на пристапот до конкурентните апликации како Viber или Instagram.
Откако Twitter го забрани пристапот на поранешниот американски претседател Доналд Трамп до оваа платформа во 2021 година, бројот на корисници на Telegram се зголеми за 25 милиони луѓе за три дена.
Telegram беше блокиран во Русија од април 2018 година до јуни 2020 година, бидејќи одби да и даде пристап на Федералната служба за безбедност (ФСБ) до информациите шифрирани на апликацијата.
И покрај забраните во Русија и некои други земји, Telegram беше преземен од 310 милиони луѓе во 2022 година, што ја прави шестата најсимнувана апликација.
Минатата година најголем број нови преземања на Telegram се забележани во Индија – 104 милиони, Русија – 34,4 милиони, Индонезија – 27,2 милиони, но и во САД – 26,9 милиони.
Во мај 2015 година, Google размислуваше за купување на Telegram, проценувајќи ја неговата вредност на 1 милијарда долари.
Во 2021 година, руската инвестициска банка ВТБ Капитал процени дека вредноста на Telegram, чие седиште сега е во Дубаи, може да достигне дури 124 милијарди долари.