Компанијата Nikola Corporation ја претстави европската верзија на својот електричен камион Tre на саемот во Хановер, Германија.

На купувачите на Стариот континент ќе им биде понуден камионот Tre како електрично возило со батерии (BEV) и како електрично возило со горивни ќелии (FCEV).

Верзијата BEV се нарекува Tre European 4×2 Artic и доаѓа со девет батерии со комбиниран капацитет од 738 kWh. Досегот е до 530 километри, а потребни се само 100 минути за полнење на батериите до капацитет од 80 отсто преку полнач од 350 kW.

Батериите го снабдуваат електричниот погон со моќност од 480 kW. Меѓуоскиното растојание е 4.021 mm и е развиено во соработка со Iveco.

Од друга страна, Nikola Tre FCEV Artic 6×2 има нешто пократко меѓуоскино растојание од 3.932 mm, а неговиот резервоар може да собере околу 70 kg водород при притисок од 700 бари. Досегот на оваа верзија е до 800 километри, а полнењето трае 20 минути.

Развојот на овој модел не е толку напреден како во случајот со верзијата BEV бидејќи FCEV нема да стигне на европскиот пазар до 2024 година.