Кога станува збор за роботиката, се чини дека инженерите инспирацијата ја наоѓаат и во змиите. Во минатото, видовме змии – роботи кои поправаат цевки на дното на океанот, машини инспирирани од змии кои лазат низ песок и почва и оние кои се користат во итни ситуации.

Меѓутоа, сега тим предводен од Џесика Бургнер-Карс, директорка на Continuum Robotics Lab на University of Toronto Mississauga, разви робот сличен на змија, флексибилен и растеглив, кој може да се користи во медицината за спасување животи. Станува збор за роботи кои можат да стигнат до тешко достапни места во човечкото тело.

„Замислете неврохирург кој треба да отстрани тумор на мозокот. Користејќи ги традиционалните крути хируршки инструменти, хирургот мора да стигне до канцерогената маса следејќи патека во мозокот и ризикувајќи да го оштети виталното ткиво. Бургнер-Карс замислува ден кога робот кој личи на змија воден од хирург ќе може да го пронајде својот пат околу виталното ткиво и точно да стигнат до саканата локација. Претходно неоперабилните тумори би можеле да станат оперативни“, велат истражувачите од споменатиот универзитет.

Затоа, роботите слични на змии би можеле да направат револуција во медицинската индустрија, а истражувачите исто така работат на полуавтономни модели кои еден ден би можеле самостојно да извршуваат задачи. Секако, хирурзите би требало да ги водат роботите до посакуваната локација, но самите роботи би можеле да избегнат пречки на патот. Резултатот би бил полесни и побезбедни операции.

Истражувачите исто така експериментираат со нови форми на роботи слични на змии кои можат да се прошират. Еден робот е инспириран од оригами, што значи дека е многу лесен и може да се прошири 10 пати во споредба со другиот дизајн. Ова го прави идеален за операции за пребарување и спасување.

Роботите постојат во различни облици и големини, па нивната можна примена е многу широка. Ова значи дека нивниот потенцијал не е ограничен на една индустрија, а развојот на роботи може да ги трансформира човечките животи во иднина и да поедностави многу од денешните комплицирани задачи.