Американската вселенска агенција НАСА конечно одреди датум за лансирање на својата SLS ракета, која ќе го означи почетокот на мисијата Artemis 1 на Месечината.

Претставниците на НАСА рекоа дека постигнуваат значителен напредок кон лансирањето на ракетата SLS на 29 август ова лето.

Тековните планови на НАСА вклучуваат лансирање на вселенското летало Orion на врвот на ракетата SLS кон Месечината, а џиновската ракета ќе биде поставена на лансирната рампа на 18 август. Потоа, има три датуми за лансирање, 29-ти август, 2-ри септември и 3-ти септември.

За да се изврши лансирањето на 29 август, односно во првиот можен прозорец, потребно е сите подготовки да се одвиваат без проблеми, а важно е и поволните временски услови.

SLS со леталото Orion треба да полета на 29 август, а леталото да се врати на Земјата на 10 октомври. Доколку лансирањето се случи на 2 септември, слетувањето е планирано за 11 октомври. Во случај на лансирање на 5 септември, враќањето на Orion се очекува на 17 октомври.

Ако SLS биде лансиран, ќе ја изврши мисијата Artemis 1 која започнува нова ера на истражување на вселената. Вселенското летало Orion ќе патува околу Месечината и ќе се врати на Земјата со спуштање во Пацификот.

Мисијата Artemis 2 ќе го изведе истиот маневар, но овој пат ќе има астронаути во вселенското летало Orion. Што се однесува до мисијата Artemis 3, таа ќе биде изведена со помош на Starship на SpaceX и ќе однесе астронаути на површината на Месечината за прв пат од 1972 година. Двете мисии се планирани за 2025 година.

НАСА на 22 август ќе спроведе анализа на подготвеноста за летање, по што дефинитивно ќе се знае дали SLS ќе лета седум дена подоцна. Пред тоа, НАСА ќе започне со активирање на системот за завршување на летот на SLS на 11 август. Овој систем е програмиран да ја уништи ракетата доколку по лансирањето излезе од курсот. Системот може да се активира само од вселенскиот центар Кенеди, а батериите мора да се полнат за да работат независно од електроенергетскиот систем на SLS. Откако ќе се активира, НАСА ќе има три недели да го лансира SLS пред да биде потребно ново активирање на системот за завршување на летот. Ако НАСА го „пропушти“ прозорецот од 5-ти септември, SLS може да биде лансиран до октомври.