Луѓето кажуваат многу работи за паметните телефони. Некои се вистинити, други се глупости. Како и обично, вистината е некаде помеѓу.

Мит 1: Подобро е да не го ажурирате телефонот бидејќи тоа го успорува

Погрешно. Германскиот експерт Штефан Хергет им препорачува на корисниците редовно да ги ажурираат своите телефони за да овозможат нови функции и да се заштитат од безбедносни пропусти.

Иако постарите уреди може, во ретки случаи, да успорат поради ажурирањата, не постои друг начин за зајакнување на безбедносните поставки.

Мит 2: Секој паметен телефон смее да се намокри, дури и оние што немаат IP заштита

Тоа зависи од количината на влага. Неколку капки нема да му наштетат на паметниот телефон, тврди Хергет.

IP кодот го штити телефонот од навлегување прашина и вода, така што сите модерни смартфони се до одреден степен заштитени.

Но, ако вашиот телефон падне во вода, може да престане да работи нормално и покрај IP заштитата.

Мит 3: Високата резолуција значи добар квалитет на камерата

Погрешно. Квалитетот на фотографиите направени со модерни смартфони не зависи од бројот на мегапиксели, туку од квалитетот на леќите, сензорите и другите технички компоненти, објаснува Хергет.

Дополнително, софтверот на камерата игра зголемена улога во квалитетот на сликата, особено кога снимате во темнина или во услови на слаба осветленост.

Мит 4: Батеријата мора целосно да се испразни пред да го приклучите телефонот на полнење

Погрешно. Оваа теза датира од времето кога батериите претежно биле направени од никел-кадмиум. Денешните литиум-јонски батерии треба да се полнат пред целосно да се испразнат.

Стефан Хергет препорачува батеријата да не се испушта под 20% од капацитетот, бидејќи целосното празнење може да ја оштети.

Мит 5: Режимот „авион“ треба да биде вклучен во авионот, во спротивно може да се урне

Погрешно. Патниците во авион треба навистина да ги исклучат своите телефони или да ги постават во авионски режим, но не затоа што можат да предизвикаат пад на авионот, туку затоа што можат да ја попречат радио комуникацијата на авионот.

Мит 6: Користењето телефон за време на бура привлекува молња

Погрешно. Нема доволно метал во паметниот телефон за да привлече молња.

Мит 7: Ако не ги ресетираме телефоните редовно, тие ќе станат побавни

Погрешно. За разлика од десктоп компјутерите, паметните телефони не мора редовно да се исклучуваат бидејќи нивните оперативни системи се дизајнирани за континуирана употреба, вели Хергет.

Мит 8: Користењето на телефонот на бензински пумпи може да предизвика експлозија

Погрешно. Предупредувањата за можноста од пожар предизвикан од користење на телефонот при полнење гориво, кои можеме да ги видиме на бензинските пумпи, постојат бидејќи горивото е запаливо.

На пример, може да дојде до пожар ако при паѓање на телефонот се оштети батеријата. Сепак, Стефан Хергет препорачува да ги ставиме телефоните во џеб додека точиме гориво.

Мит 9: Исклучувањето на апликациите кога не ги користите го забрзува вашиот паметен телефон и заштедува енергија од батеријата

Тоа зависи од староста и нашите навики за користење на уредот. Современите паметни телефони сами ги успоруваат апликациите за да ја заштедат батеријата, објаснува Хергет.

Затоа, апликациите не треба да се исклучуваат. Освен тоа, доколку не ги исклучиме апликациите кои редовно ги користиме, можеме да ја зачуваме батеријата, бидејќи во тој случај не мора постојано да се рестартираат. Но, сепак, има смисла да се исклучат апликациите на постарите уреди.

Мит 10: Можно е да се пренесе вирус на паметен телефон преку СМС порака

Погрешно. Вирусите не можат да се пренесат на овој начин, вели Хергет. Сепак, криминалците можат да испратат линк преку СМС до паметен телефон што води до страници кои можат да ги украдат вашите податоци.