Иако сè уште не се знае точно какво влијание имаат микропластичните честички врз нашето здравје, научниците се загрижени бидејќи лабораторијата покажала дека тие можат да предизвикаат оштетување на човечките клетки.

Со децении, човештвото има проблеми со отстранување на пластичниот отпад, а микропластиката досега е пронајдена на секој дел од нашата планета; од врвот на Монт Еверест до подножјето на најдлабоките океани, пишува The Guardian.

Научниците претходно открија дека луѓето внесуваат и вдишуваат микропластични честички преку храна и вода – потврдено е нивно присуство во изметот на бебињата и возрасните.

Во најновата студија, научниците анализирале примероци од крв од 22 здрави анонимни дарители и откриле несакани честички во 17 од нив (речиси 80%). Половина од примероците содржеле ПЕТ пластика, која вообичаено се користи во шишиња за пијалоци, додека една третина содржела полистирен што се користи за пакување храна и други производи. Една четвртина од примероците од крвта содржеле полиетилен од кој се направени пластични кеси.

„Нашата студија покажа дека имаме полимерни честички во крвта, што е револуционерно откритие. Но, треба да го прошириме истражувањето и да ја зголемиме големината на примероците, бројот на проценети полимери итн.“, рече екотоксикологот Дик Ветаак од Vrije Universiteit Amsterdam.

„Разумно е да сме загрижени. Честичките се таму и се пренесуваат низ целото тело“, рече Ветаак.

Тој додаде дека количината и видот на пластиката значително се разликуваат помеѓу примероците на крв. Тој објасни дека можеби станува збор за краткорочна изложеност, како на пример пиење од пластична чаша, пред да земе примероци од крв.

„Прашањето е што се случува со честичките во нашето тело? Дали остануваат во него? Дали патуваат до одредени органи? И дали нивното ниво може да му наштети на нашето здравје? Треба итно да финансираме понатамошни истражувања за да можеме да ги дознаеме одговорите на овие прашања“, рече Ветак.

Студијата Discovery and quantification of plastic particle pollution in human blood беше објавена во списанието Environment International.

Извор: Index.hr