Австралиски милијардер покрена кривична постапка против Facebook, обвинувајќи ја компанијата за неуспешно спречување на лажни реклами – измами, кои користеле негова фотографија, јави BBC.

Ендрју Форест тврди дека Facebook ги прекршил австралиските закони за перење пари со тоа што не ги спречил лажните реклами за криптовалути, кои притоа користеле негова фотографија. Тој додаде дека, по првпат, Facebook се соочува со кривично дело, глобално.

Мета, која го поседува Facebook, не коментираше за случајот на Форест, но рече дека се „посветени на тоа да ги држат тие луѓе (измамници) подалеку од платформата“.

Д-р Форест, кој е претседавач на Fortescue Metals, обвини дека Фејсбук бил „криминално непромислен“ и тврди дека компанијата не успеала да ги отстрани објавите на измамниците кои ја користат неговата фотографија за промовирање на инвестиции во криптовалути, кои се појавуваат на веб-страницата од март 2019 година. Измамниците користеле и фотографии од други познати личности. Иако Facebook забранува такви реклами, многу од нив, сè уште се појавуваат на платформата.

Форест појасни дека во ноември 2019 година, му пишал отворено писмо на создавачот на Facebook, Марк Цукерберг, поттикнувајќи го да преземе повеќе, за да се реши проблемот.

– Загрижен сум за невини Австралијци кои се излажани од „кликбејт“ реклами на социјалните мрежи, додаде Форест.

Тој реагира заради Австралијците, но „ова се случува насекаде во светот“.

Случајот во австралискиот суд ќе започне од 28 март. Ако заврши успешно, Facebook може да се соочи со казни, или да биде принуден да го промени своето рекламирање.

Форест, исто така, поднесе граѓанска тужба во американската сојузна држава Калифорнија, каде што е седиштето на Facebook.

Во таа тужба, тој тврди дека Facebook „свесно профитира од овој циклус на нелегални реклами“, пренесе весникот „The Australian“.

Една жртва во Австралија, изгубила 670.000 долари, поради лажна потврда на Форест, пишува весникот, повикувајќи се на судски документи.

Во изјава за медиумите, Мета соопшти дека рекламите за измама ги прекршуваат нејзините политики.

– Имаме повеќеслоен пристап со цел да ги запреме овие реклами. Ние работиме, не само за да ги детектираме и да ги отфрлиме самите реклами, ами и да ги блокираме огласувачите од нашите сервиси, а во некои случаи, преземаме и судски дејствија за да се спроведат нашите политики, изјави претставник на Мета.