Компанијата Virgin Galactic продаде околу 100 билети на заинтересирани вселенски туристи во последниве неколку месеци. Откако основачот на компанијата Ричард Бренсон полета во Вселената летово, компанијата ужива невиден интерес за вселенскиот туризам. Првите следни комерцијални вселенски летови се очекува да почнат до крајот на 2022 година, соопшти компанијата.
Сегашната цена за место во едно од леталата е 450.000 долари – многу повисока од 200.000 – 250.000 долари, колку што платиле околу 600 клиенти од 2005 до 2014 година. Вкупно, компанијата веќе продала 700 билети.
„Влегуваме во период на подобрување на „вселенската флота“ со јасна визија за зголемување на издржливоста, доверливоста и предвидливоста на нашите летала како подготовка за комерцијални летови следната година“, рече извршниот директор Мајкл Колгласер. „Побарувачката за вселенски патувања е многу голема и ги продаваме билетите многу побрзо од очекуваното“.
Основана 2004 година, Virgin Galactic се претставува како агенција за вселенски туризам. Во септември доживеа критики, откако Федералната управа за воздухопловство (FAA) откри дека летот во јули отстапил од определениот воздушен простор и фирмата „не ја пријавила незгодата“.