Најновите извештаи сугерираат дека шпанската влада ќе спроведе аукција на спектарот од 26 GHz помеѓу крајот на 2021 и почетокот на 2022 година.

Во споредба со некои од своите европски соседи, патувањето на Шпанија со доделување на 5G спектарот беше релативно едноставно, но не помина без пречки.

Во 2018 година, шпанското Министерство за економски прашања и дигитална трансформација додели спектар во опсегот од 3.5 GHz, потег што му овозможи на Vodafone да ги лансира своите први 5G услуги зо земјата во јуни 2019 година, а неговите ривали се веднаш зад него. Ова ја направи Шпанија една од првите држави што го усвоија 5G во Европа.

Додека 5G мрежите на Vodafone, Orange, Masmovil и Telefonica постојано растеа во текот на следните две години, проширувањето на нивниот спектар беше многу побавен процес. Аукција на опсегот од 700 MHz првично беше закажана на почетокот на 2020 година, но поради пандемијата, процесот беше одложен. Пред да може повторно да започне процесот, несогласувањата меѓу регулаторот и операторите во однос на цените и условите, доведоа до тоа регулаторот уште повеќе да ја уназади постапката.

До мај 2021 година, регулаторот ја намали резервната цена на спектарот за 15 проценти во обид да го зголеми интересот, но и ги отстрани обврските за победничките оператори да им дадат пристап на третите страни до нивната инфраструктура.

Аукцијата конечно се одржа во јули, откако доцнеше 18 месеци. Многу посакуваниот спектар од 700 MHz собра повеќе од милијарда евра за владата, надминувајќи ги малку очекувањата.

Забележително е дека Masmovil не учествуваше на аукцијата, бидејќи беше една од најкритичните страни во однос на правилата на регулаторот за аукцијата. Операторот моментно е во процес на купување на петтиот шпански оператор Euskratel и побара од регулаторот да ја одложи аукцијата, додека не заврши спојувањето. Исто така, побара од регулаторот да резервира дел од спектарот по разумна цена, за операторите без фреквенции во ниските опсези или да ги подели блоковите на регионална основа.

Овие барања на крајот не беа исполнети, при што регулаторот не сакаше повеќе да ја одложува аукцијата.

Сега, со аукција на 5G спектарот со низок и среден опсег, извештаите сугерираат дека високопојасниот, mmWave 5G спектар може да се најде на аукција веќе кон крајот на оваа година.

Повикувајќи се на коментарите на државниот секретар за телекомуникации и интелигентна инфраструктура, Роберто Санчез, Europa Press наведува дека владата во моментов работи на деталите за аукцијата на 26 GHz, очекувајќи дека процесот ќе се одржи кон крајот на оваа година или почетокот на следната.

Според извештајот, се чини дека веројатно дел од спектарот од 26 GHz ќе биде резервиран за заедничка употреба од страна на индустриските играчи.