Јапонскиот синдикат на рибари продолжува да се спротивставува на идејата за испуштање на радиоактивна вода од нуклеарната централа Фукушима во океанот, додека владата покажува знаци дека контроверзниот план сепак ќе биде реализиран.

Јапонскиот премиер Јошихиде Суга се состана со шефот на Националната федерација на рибари, Хироши Киши, за да разговара за опциите за отстранување на радиоактивната вода што се акумулирала во резервоарите околу нуклеарната централа.

Се чини дека состанокот не бил успешен бидејќи рибарите продолжуваат да се спротивставуваат на испуштањето радиоактивна вода во океанот, што би се случило во наредните години. Планот сè уште не е одобрен со закон, но се смета за главна опција кога станува збор за насобирањето вода.

„Испуштањето на ‘третираната’ вода е неизбежно, а експертите препорачуваат дека најреалниот метод што може да се спроведе е всушност испуштање во океанот. Врз основа на овие препораки, би сакал да одлучиме за владината политика. Веќе не можеме да го одложуваме проблемот со тоа што да се прави со водата“, рече премиерот.

Нуклеарната централа Фукушима беше оштетена во 2011 година откако Јапонија беше погодена од земјотрес со јачина од 9 степени по Рихтер, проследен со разорно цунами. Оттогаш, собрано е големо количество контаминирана течност, која вклучува вода за ладење, подземна вода и дождовница, која завршува во електраната секој ден.

Во моментов има околу 1,2 милиони тони радиоактивна вода складирана во резервоарите кои ќе бидат полни до 2022 година.

Планот за испуштање вода во океанот се најде на удар од еколошките групи. Се смета дека планот на јапонската влада може да предизвика еколошка катастрофа. Во октомври, Greenpeace го обвини Токио за „искривување“ на вистината зборувајќи за „третирана вода“, тврдејќи дека течноста содржи „опасно ниво на јаглерод-14“ што може да ја „оштети човечката ДНК“.

Во март, Јапонија побара помош од Меѓународната агенција за атомска енергија (IAEA) во плановите за решавање на проблемот. IAEA ги поддржа плановите на јапонската влада и изрази верба во одлучноста на Токио и технолошкиот капацитет за испуштање на вода на вистински начин.

Извор: Klix.ba